Doe voer die goede sente Brandaen
		Metten Gods zeghe beuaen
		Toten ouersten hende [= ende]
1560		Onder eene steenwennde;
		Daes saghen sie alse bernende voghele varen
		Huut eenen bernenden berghe te waren	[= Uut]
		Van menegherande tonghen,
		Die hel niet en zonghen
1565		Dan o wy ende wach ende wee;
		Eene grondeloze zee
		Slouch daervp die west zijde ane,
		So datment hoerde dane
		Ouer meneghe mile.
1570		Daer na in corter wile
		Saghen si huut eenen berghe slaen	[= uut]
		Eene vlamme so ghedaen,
		Daer die gleinstren hute vloghen	[= ute]
		Also groet als een houen	[= ouen]
1575		Ende colen also groot als maste.
		Daer was pijne ende onraste.
		Huut dien seluen berghe ran	[= Uut]
		Een water sulc en sach noint man,
		Het was zwart ende het wiel;
1580		Bander zijde daer hute viel	[= ute]
		Een water ende een wint ghereede,
		Die also cout waren beede,
		Dat nye couder dinc ghewart;
		Daer hadden si moylike vaert.
1585		Vp deen zijde was hitte menichfout,
		Vp dander zijde wasest so cout
		Dat den bomen in dien tijden
		Die scorse scoolden vanden zijden.
		Doe so hiet sente Brandaen
1590		Hem allen ten riemen gaen;
		Beede moonken ende scipman,
		Alle vinghen si daer an.
		Daer en wilden si niet letten meer.
	[188c]	Daer si waren commen eer
1595		Binnen eenen daghe gheuaren,
		Ghekeerden si cume in .ij. iaren.
[vorige][inhoud] [volgende]