Nu sal die tijd ende die voghele droeven

Nu sal die tijd ende die voghele droeven;
Dies en sal hi niet behoeven
Die hem met waerheiden wilt voeghen
Te werkenne in hogher trouwen raet:
Hi sal sinen lieve met trouwen ghenoeghen;
Dat es dat alre rijcste toeverlaet.

Hoe dat el metten tide steet,
Die metten werken in waerheit gheet
Hem es alle uren wel ghereet
Bloyen, bliscap, somer ende dach.
Hi es altoes nuwe ende van niede heet;
Hem en doet meer winter wederslach.

Die hem met trouwen in waerheit ghevet
Ende met waerheden dan trouwe levet,
Dat verhoelne word wordt hem gheseghet,
Dat niemant vremders en mach verstaen,
Dan diet van smake ghevoelt al hevet
Ende in hoech gheruchte scilentie ontfaen.

Na neder stille ende hoech gherochte,
Volcommenne troeste ende anxtelike sochte,
Ondane hebbe die hem daer teghen duchte,
Sint dat al hevet dus groet ghewin.
Die edele bloemen metter vrochte
Verstaet ende merct, vri edel sin.

Ay, edele sinne, waer sidi henen?
Hoe mogedi u dus neder ghelenen,
Die langhe ghetoent hebt ende ghescenen
Ocht ghi op trouwen altoes moest teren?
Ocht ghi van trouwen ie wordt gherenen,
Hoe moghedi u met min gheneren?

Vele esser gheroepen ende scone ghetoent
Ende luttel vercoren: wat hulpet verscoent?
Die lose sijn selve doch meest ghehoent,
Als trouwe na werke sal ghelden al
Ende si hare vriende alle croent
Met dat si es ende wesen sal.

Maer, vri edele sinne ende wel gheboren,
Beide gheroepen ende vercoren,
En spaert cost noch pine daervoren
Te levenne in hogher trouwen vlijt;
U leven si al heylich toren,
Tote ghi uws liefs gheweldich sijt.

Ay, herten, en laet u niet vernoyen
U meneghe smerten: u sal saen bloyen;
Ghi sult alle storme dore royen,
Tote dat ghi comt in dat weldeghe lant,
Daer lief in lief sal al dore vloyen:
Dies is hier edele trouwe u pant.

God moete den edelen redennen gheven
Die hen verlichte dellendeghe leven,
Die nu ghequetset sijn en de sere verdreven
Onder der wreder vremder slach.
Alse lief in lief sal werden verheven,
Hoe wel dat hem dat liken mach.


Hadewijch


Ingezonden door Constant Broos
HTML: Marc van Oostendorp, voor het Project Laurens Jz. Coster